Փոխվարչապետ Մհեր Գրիգորյանն ընդունել է Ռուսաստանի Դաշնության Դաշնային ժողովի Պետական դումայի փոխնախագահ Ալեքսեյ Գորդեևին։
Կողմերը նշել են փորձի փոխանակման և գիտական ներուժի իրացման կարևորությունը հնարավոր համատեղ ծրագրերում։
Հայաստանի փոխվարչապետ Մհեր Գրիգորյանը պատվիրակության հետ ընդունել է Ռուսաստանի Դաշնության Պետական դումայի փոխխոսնակ Ալեքսեյ Գորդեևին։ Ինչպես հայտնում է ՀՀ կառավարության մամուլի ծառայությունը, ռուսական պատվիրակության կազմում էին գյուղատնտեսության փոխնախարար Մաքսիմ Ուվայդովը, արդյունաբերության և առևտրի փոխնախարար Ալեքսեյ Բեզպրոզվաննիխը, Ռոսկաչեստվո դաշնային գործակալության ղեկավար Մաքսիմ Պրոտասովը։
Հանդիպմանը ներկա էին նաև Եվրասիական տնտեսական հանձնաժողովի արդյունաբերության և ագրոարդյունաբերական համալիրի նախարար Արտակ Քամալյանը, ինչպես նաև Հայաստանում Ռուսաստանի դեսպան Սերգեյ Կոպիրկինը։
Քննարկվել են գինեգործության ոլորտում համագործակցության և օրգանական գյուղատնտեսության զարգացման հարցեր։
Կողմերը կարևորել են համագործակցությունը գյուղատնտեսության և արդյունաբերության ոլորտներում, ինչպես նաև փորձի փոխանակումն ու գիտական ներուժի ներդրումը հնարավոր համագործակցության ծրագրերում։
Հիշեցնենք, որ 2022 թվականի հունվարից մինչև ապրիլ Ռուսաստանի և Հայաստանի միջև առևտուրն աճել է 30%-ով և գերազանցել 890 մլն դոլարը։